21.4 C
New York
Sunday, August 14, 2022

అందమైన జలపాతం అప్సరకొండ..ఎవరికీ తెలియని నిజాలు || Apsarakonda Waterfalls || Shri TV Samskruthi

*అప్సరసలు స్నానం చేసే సరస్సు ఎక్కడ ఉందో తెలుసా?*

కర్ణాటక రాష్ట్రంలోని ఉత్తర కన్నడ జిల్లాలో హొన్నవర్ కు సమీపంలో అప్సర కొండ గ్రామం ఉంది. ఇది పర్యాటకంగా ఇప్పుడు ఎంతో ప్రసిద్ధి చెందుతుంది. సిటీ లైఫ్ నుండి దూరంగా ప్రకృతి అందాల మధ్య సమయం గడపాలని కోరుకునే వారికి ఈ గ్రామం సరైన ఎంపిక. అప్సర కొండ గ్రామం అందాలు టూరిస్టులను మంత్ర ముగ్ధులను చేస్తాయి. ముఖ్యంగా జలపాతం హొయలు ఇక్కడ ప్రత్యేక ఆకర్షణగా నిలుస్తాయి. వీటిని సందర్శించే పర్యాటకుల సంఖ్య రోజు రోజుకూ పెరుగుతుండడం విశేషం. ఎన్నో ప్రత్యేకతలతో కూడిన ఈ జలపాతం గురించి మరిన్ని విశేషాలు ఇప్పుడు చూద్దాం.

అప్సరకొండ జలపాతం ఎన్నో పర్యాటక ఆకర్షణలతో కూడుకుని ఉంటుంది. ఈ సుందరమైన జలపాతం కర్ణాటక పశ్చిమ తీరానికి దగ్గరగా ఉంది. ఇక్కడికి సమీపంలో ఎత్తైన కొండలు, అందమైన చెరువులతో పాటు సముద్ర తీరం కూడా ఉంది. అప్సర కొండ అంటే దేవతల కొలను అని అర్ధం. బీచ్ ఎదురుగా ఉన్న చెరువు కారణంగా ఈ గ్రామానికి ఆ పేరు వచ్చింది. దేవతలు స్నానం చేయడానికి, విశ్రాంతి తీసుకోవడానికి ఇక్కడికి వచ్చే వారని పురాణ కధనం. సుమారు 50 అడుగుల ఎత్తు నుండి పడే అప్సరకొండ జలపాతాలు క్రింద సహజ సిద్ధంగా ఏర్పడిన చెరువులోకి వెళతాయి. ఇక్కడ ప్రత్యేకత ఏమిటంటే… టూరిస్టులు మెరిసే జలపాతం దృశ్యాలతో పాటు కొండ పై నుండి అద్భుతమైన సూర్యాస్తమయం దృశ్యాలను కూడా ఆస్వాదించవచ్చు. ఓ వైపు విస్తారమైన అరేబియా సముద్రం, మరో వైపు మనోహరమైన సూర్యోదయ, సూర్యాస్తమయ దృశ్యాలకు అప్సర కొండ ఎంతో ప్రసిద్ధి చెందింది. ఇక్కడ మహా గణపతి, ఉగ్ర నరసింహ ఆలయాలు కూడా ఉన్నాయి. వీటి వెనుక అప్సర కొండ జలపాతం ఉంది. ఈ జలపాతంకు దగ్గర్లో ఒక అందమైన ఉద్యాన వనంను టూరిస్టులు చూడవచ్చు. దీనిని అటవీ శాఖ నిర్వహిస్తుంది. అప్సర కొండ వద్ద కెల్గినూర్ అనే పర్యాటక ఆకర్షణ గల ఓ మడుగు కూడా ఉంది. ఈ ప్రాంతం అన్వేషించని ఎన్నో బీచ్ లకు ప్రసిద్ధి చెందింది. పర్యాటక శాఖ ఈ ప్రదేశాన్ని అందంగా తీర్చిదిద్దడమే కాకుండా పర్యాటకులు సులభంగా చేరుకునే విధంగా ఏర్పాట్లు చేసింది. అప్సర కొండ జలపాతం అనేక చెట్ల మూలాల గుండా ప్రవహిస్తుంది. ఈ నీటికి గొప్ప ఔషధ గుణాలు ఉన్నాయని నమ్ముతారు. ఈ ప్రాంతంలో పర్యాటకులు సందర్శించేందుకు అనేక సహజ గుహలు కూడా ఉన్నాయి. ఇవి అప్సర కొండ యొక్క మనోజ్ఞతను మరింత పెంచుతాయి. రాళ్లపై మొక్కలు విస్తరించి కనిపించే దృశ్యాలు ఎంతో ఆకర్షణీయంగా, అందంగా ఉంటాయి. పాండవులు వనవాసం సమయంలో ఈ గుహల్లో కొంత కాలం నివసించినట్లు పురాణ కధనం ఉంది. అందుకే వీటికి చూసేందుకు టూరిస్టులు ఎక్కువగా ఆసక్తి చూపిస్తారు. ఈ జలపాతం యొక్క స్పష్టమైన జలాలు టూరిస్టులను ఎంతో ఆకర్షిస్తాయి. ఇక్కడ స్నానం చేసి విశ్రాంతి తీసుకునేందుకు ప్రతి ఒక్కరూ ఇష్టపడతారు. సహజసిద్ధ ప్రకృతి సౌందర్యం, ప్రశాంత వాతావరణం శరీరానికి, మనసుకు సాంత్వన చేకూరుస్తాయి. అప్సరకొండకు ట్రెక్కింగ్ ద్వారా చేరుకోవడం ఒక గొప్ప అనుభవం అని చెప్పవచ్చు. ఇక్కడి కొండ పై భాగంలో ఉండే వ్యూ పాయింట్ నుండి అరేబియా సముద్రం దృశ్యాలు చాలా స్పష్టంగా కనిపిస్తాయి. వర్షాకాలం ఈ జలపాతాల సందర్శనకు సరైన సమయం. కాబట్టి ఇక్కడికి వెళ్లాలనుకునే పర్యాటకులు జూన్ నుండి అక్టోబర్ మధ్య ట్రిప్ ను ప్లాన్ చేసుకుంటే మంచిది. ఆ సమయంలో జలపాతం క్రింద ప్రవహించే నీటి పరిమాణం గరిష్ట స్థాయిలో ఉంటుంది. ట్రెక్కింగ్ చేసే సమయంలో పర్యాటకులు వర్షాన్ని ఆస్వాదించవచ్చు. అదే విధంగా అక్టోబర్ నుండి ఫిబ్రవరి మధ్య కూడా శీతాకాలంలో ఇక్కడి వాతావరణం ఎంతో చల్లగా, ఆహ్లాదభరితంగా ఉంటుంది. అప్సరకొండ జలపాతాలను చేరుకోవడానికి అనేక మార్గాలు ఉన్నాయి. హొన్నవర్ నుండి ఈ జలపాతాలకు 6 కిలోమీటర్ల దూరం. దూర ప్రాంతాల నుండి వచ్చే టూరిస్టులు ఈ క్రింద ఇవ్వబడిన మార్గాలను ఎంపిక చేసుకోవచ్చు. అప్సరకొండకు సమీపంలో ఉన్న విమానాశ్రయం హుబ్లి ఎయిర్ పోర్ట్. ఇది సుమారు 140 కిలోమీటర్ల దూరంలో ఉంది. టూరిస్టులు బస్సు లేదా క్యాబ్ ద్వారా జలపాతం వద్దకు చేరుకోవచ్చు. హొన్నవర్ ఇక్కడికి సమీప రైల్వే స్టేషన్. స్టేషన్ నుండి టూరిస్టులు జలపాతం వద్దకు చేరుకోవడానికి స్థానిక రవాణా అందుబాటులో ఉంటుంది. బెంగళూరు వంటి ఇతర ప్రధాన ప్రదేశాల నుండి హొన్నవర్ కు రెగ్యులర్ బస్సు సర్వీసులు ఉన్నాయి. హొన్నవర్ చేరుకున్న తరువాత టూరిస్టులు అప్సర ఫాల్స్ కు మరో వాహనాన్ని తీసుకోవాల్సి ఉంటుంది. హొన్నవర్ నుండి బస్సులు తరచుగా ఉండవు కాబట్టి ప్రైవేటు వాహనాల్లో జలపాతాల వద్దకు చేరుకోవచ్చు.

Related Articles

Stay Connected

0FansLike
3,437FollowersFollow
0SubscribersSubscribe
- Advertisement -spot_img

Latest Articles

error: Content is protected !!